ភ្នំពេញ​: បុរស​ម្នាក់​រងរបួស​បាក់ឆ្អឹង​ដៃ​ជាប់​នឹង​រថយន្ត បន្ទាប់ពី​ជិះ​ម៉ូតូ​ទៅបុក​រថយន្ត​ពេញទំហឹង ហើយ​រថយន្ត​បាន​រេ​ចង្កូត​បន្ត​បុក​ចូល​ផ្ទះ​ប្រជាពលរដ្ឋ រង​ការខូចខាត​យ៉ាងដំណំ​ ​ដែល​ហេតុការណ៍​កើតឡើង​កាល​វេលា​ម៉ោង​១២​និង​៣០​នាទី​យប់​រំលងអធ្រាត្រ ឈានចូល​ថ្ងៃអាទិត្យ ទី​១៧ ខែកុម្ភៈ ឆ្នាំ​២០១៩ ត្រង់ចំណុច​ផ្លូវបំបែក​ជា​បួន ផ្លូវ​លេខ​១៦៣ កែង​និង​៣៦០ ក្នុង​សង្កាត់​ទួល​ស្វាយព្រៃ​ទី​១ ខណ្ឌចំការមន​។​

​តាម​សម្តី​អ្នកបើកបរ​រថយន្ត​បាន​ប្រាប់ថា ដំបូង​ឡើយ​រូបគាត់​បាន​បើករថយន្ត​ម៉ាក​ព្រូស ពណ៌​ខ្មៅ ពាក់​ស្លាក​លេខ​ភ្នំពេញ 2AV 8717 ជិះ​តែម្នាក់ឯង តាម​បណ្តោយ​ផ្លូវ​១៦៣ ទិសដៅ​ពី​ជើង​ទៅ​ត្បូង​ក្នុង​ល្បឿន​លឿន​គួរសម​។ លុះ​មកដល់​កន្លែងកើតហេតុ​ខាងលើ ក៏​ស្រាប​តែមាន​ម៉ូតូ​មួយគ្រឿង​ម៉ាក​ហុងដា ឌ្រី​ម​សង់​១២៥ ស៊េរី​២០១៦ ពណ៌​ខ្មៅ ពាក់​ស្លាក​លេខ ភ្នំពេញ 1FX 2552 បើកបរ​ដោយ​បុរស​ម្នាក់​តាម​បណ្តោយ​ផ្លូវ​៣៦០ ទិសដៅ​ពី​កើ​តទៅ​លិច យ៉ាង​លឿន​ទៅបុក​ចំ​ធុងសាំង​ចំហៀង​ខាងក្រោយ​ពេញទំហឹង បណ្តាល​បាក់ឆ្អឹង​ដៃ​ជាប់​នឹង​រថយន្ត គួរ​ឲ្យ​រន្ធត់​ណាស់​។ ភ្លាមៗ​ក៏មាន​រថយន្ត​សង្គ្រោះ​ឯកជន​មក​ដឹក​ទៅកាន់​មន្ទី​ពេទ្យ​ផងដែរ​។ ចំណែកឯ​រថយន្ត​បាន​រេ​ចង្កូត​បុក​ចូល​ផ្ទះ​ជាងគំនូរ “​ខ្មែរ​ទាន់សម័យ​” ទៅបុក​ម៉ូតូ​ដែល​ចត​ក្នុងផ្ទះ​ម៉ាក​ស្គុ​ត​ពី​ពណ៌​ខ្មៅ ពាក់​ស្លាក​លេខ ភ្នំពេញ 1HD 8729 បណ្តាល​ឲ្យ​បាក់​ដាច់​កន្ទុយ​ម៉ូតូ តែ​សំណាងល្អ​មិន​ខូចខាត​ដល់ផ្ទះ​។​

​ក្រោយពី​កើតហេតុ សមត្ថកិច្ច​មូលដ្ឋាន​បាន​ចុះមក​ដល់ ហើយក៏​ទាក់ទង​ទៅ​ជំនាញ​ចរាចរណ៍​មក​វាស់វែង និង​យក​ម៉ូតូ​មួយគ្រឿង​និង​រថយន្ត​ទៅ​រក្សាទុក​នៅ​ចរាចរណ៍​ផ្លូវគោក នៃ​ស្នងការដ្ឋាន​នគរបាល​រាជធានី​ភ្នំពេញ រង់ចាំ​ដោះស្រាយ​គ្នា​នៅពេល​ក្រោយ​។ ចំណែក​ម៉ូតូ​មួយគ្រឿង​ទៀត​របស់​ម្ចាស់ផ្ទះ គាត់​មិន​ចង់​វែងឆ្ងាយ​ឲ្យ​អ្នកណា​សង​គាត់​នោះទេ គាត់​សុខចិត្ត​យក​ម៉ូតូ​ទៅ​ជួសជុល​ដោយ​ខ្លួនឯង​៕ ប្រភព៖​ www.rasmeinews.com