ភ្នំពេញ​៖ កម្ពុជា រំពឹងថា​នឹង​អាច​ទទួលបាន​កំណើន​ភ្ញៀវទេសចរ​ចិន ចំនួន​៣​លាន​នាក់ នៅក្នុង​ឆ្នាំ​២០២០​ខាងមុខនេះ និង​កំណើន​បន្តបន្ទាប់​ទៀត​ដល់ ៥​លាន​នាក់ ក្នុង​ឆ្នាំ​២០២៥ និង​៨​លាន​នាក់ ក្នុង​ឆ្នាំ​២០៣០​។ នេះ​ជាការ​លើកឡើង​របស់លោក ថោង ខុន រដ្ឋមន្ត្រី​ក្រសួងទេសចរណ៍ នា​កិច្ចប្រជុំ​ទ្វេរ​ភាគី ជាមួយ​លោក ឡ ស៊ូ​កាង (Luo Shugang)​រដ្ឋមន្ត្រីក្រសួង​វប្បធម៌ និង​ទេសចរណ៍ កាលពី​ថ្ងៃទី​២៩ មករា ឆ្នាំ​២០១៩ នៅ​ទីស្តីការ​ក្រសួងទេសចរណ៍​។​

​ក្នុងជំនួប​នោះ រដ្ឋមន្ត្រី​ក្រសួងទេសចរណ៍ បន្តទៀតថា អនាគត​នៃ​វិស័យ​ទេសចរណ៍​កម្ពុជា គឺ​មិនអាច​កាត់ផ្តាច់​ចេញពី​កំណើន នៃ​លំហូរ​ទេសចរ និង​វិនិយោគិន​ចិន​បានទេ​។ លោក ថោង ខុន បញ្ជាក់​ដូច្នេះ​៖«​កំណើន​ភ្ញៀវទេសចរ​ចិន គឺជា​កាលានុវត្តន៍​ដ៏​សំខាន់ មិន​ត្រឹមតែ​ជំរុញ​នូវ​ការអភិវឌ្ឍ​វិស័យ​ទេសចរណ៍​ប៉ុណ្ណោះ​ទេ ប៉ុន្តែ​ថែមទាំង​បង្កើត​នូវ​ឱកាស​វិនិយោគ​ក្នុង​វិស័យ ផ្សេងៗ នៅ​កម្ពុជា ក៏ដូចជា​ប្រទេស​ក្នុង​អាស៊ាន បានចាត់ទុក​ចិន​ជា​ដៃគូ​យុទ្ធសាស្ត្រ និង​ជា​ប្រភព​ទីផ្សារ​ដ៏​សំខាន់បំផុត​សម្រាប់​មូលដ្ឋាន​នៃ​កំណើនសេដ្ឋកិច្ច និង​ការអភិវឌ្ឍ​ប្រទេសជាតិ​»​។​

​សូមបញ្ជាក់ថា នៅក្នុង​ឆ្នាំ​២០១៨ ភ្ញៀវទេសចរ​ចិន​ដែល​មក​កម្ពុជា មាន​ប្រមាណ ១,៩​លាន​នាក់ កើន​៧១​ភាគរយ បើ​ធៀប​ទៅនឹង​ឆ្នាំ​២០១៧ ដែលមាន​ជាង ១,២​លាន​នាក់​៕