ភ្នំពេញ ​៖ ​ស្ត្រី​ម្នាក់​ ត្រូវ​បាន​កម្លាំង​សមត្ថកិច្ច​ប្រចាំ​ផ្សារ​ធំ​ថ្មី​ ចាប់​បញ្ជូន​ទៅ​អធិការ​នគរបាល​ខណ្ឌ​ដូន​ដើម្បី​ចាត់ការ​តាម​នីតិ​វិធី​ ដោយសារតែ​ស្ត្រី​រូប​នោះ​ គាត់​បាន​យក​ខ្សែក​កាឡៃ​ទៅ​ប្ដូរ​យក​ខ្សែ​មាស​របស់​អ្នកលក់ ​នៅ​ក្នុង​ផ្សារ​ តែ​គេច​មិន​រួច​ ព្រោះ​ជនរងគ្រោះ​អ្នកលក់​ដឹង​ទាន់​សភាពការណ៍​ ក៏​ស្រែក​ឆោឡោ​ ហើយ​ត្រូវ​ចាប់​ខ្លួន​បាន​តែម្តង។

ស្ត្រី​ដែល​យក​មាស​ក្លែងក្លាយ​យកទៅ​ប្តូរ​មាន​សុទ្ធ​នោះ ​ត្រូវ​ឃាត់ខ្លួន​នៅ​ថ្ងៃទី​៣០ ខែមករា ឆ្នាំ​២០១៨ វេលា​ម៉ោង​១០​និង​០០​នាទី ដែល​កម្លាំង​នគរបាល​ប្រចាំ​ទី​រួម​ផ្សារ​ធំថ្មី នៃ​អធិការដ្ឋាន​នគរបាល​ខណ្ឌ​ដូនពេញ បានធ្វើការ​ឃាត់ខ្លួន​ជនសង្ស័យ​ចំនួន​០១​នាក់​ ពីបទ​លួច (​លួច​បន្លំ​យក​ខ្សែក​កាឡៃ​ប្ដូរ​យក​ខ្សែក​រមាស​) ប្រព្រឹត្ត​នៅ​ចំណុច​តូប​លេខ​.G4.061 ក្នុង​ទី​រួម​ផ្សារ​ធំ​ថ្មី ផ្លូវ​លេខ​៦៧ ភូមិ​ទី​៤ សង្កាត់​ផ្សារ​ថ្មី​ទី​១ ខណ្ឌ​ដូនពេញ រាជធានី​ភ្នំពេញ​។​

សមត្ថកិច្ច​បញ្ជាក់​ថា ​អត្តសញ្ញាណ​ជនសង្ស័យ ​ឈ្មោះ ពៅ ចិន្តា ភេទ​ស្រី អាយុ​៥២​ឆ្នាំ ជនជាតិខ្មែរ​កម្ពុជា​ក្រោម មុខរបរ​មិន​ពិតប្រាកដ ទីលំនៅ​ផ្ទះជួល ម្តុំ​ចាក់អង្រែលើ ផ្លូវលំ សង្កាត់​ចាក់អង្រែលើ ខណ្ឌ​មានជ័យ រាជធានី​ភ្នំពេញ​។ រីឯ​វត្ថុតាង ​ចាប់យក​បាន​មាន​ខ្សែក​លោហធាតុ​ ពណ៌​លឿង​ ប្រវែង​០,៧៥​ម៉ែត្រ ចំនួន​០១​ខ្សែ (​ប្រគល់ជូន​ជនរងគ្រោះ​វិញ​)។ ចំណែក​ខ្សែក​លោហធាតុ​ពណ៌​លឿង​ប្រវែង​០,៦៥​ម៉ែត្រ​ចំនួន​០១​ខ្សែ​(​ជា​របស់​ជនសង្ស័យ​)​។​ ​​អត្តសញ្ញាណ​ជនរងគ្រោះ​ ឈ្មោះ ស្រេង នី​រត​នះ ភេទ​ប្រុស អាយុ​៣០​ឆ្នាំ ជនជាតិ​ខ្មែរ មុខរបរ​លក់​មាស មាន​ទី​លំនៅ​ផ្ទះ​លេខ​២ ផ​R10(​បុរី​ប៉េង​ហួត បឹង​ស្នោ សង្កាត់​និរោធ​ ខណ្ឌ​ច្បារអំពៅ រាជធានី​ភ្នំពេញ​។​

សមត្ថកិច្ច​បញ្ជាក់​ទៀត​ថា​ ដំណើររឿង​ហេតុ​នោះ ​គឺ​នៅ​មុនពេល​កើតហេតុ ជនរងគ្រោះ​ ឈ្មោះ​ស្រេង នី​រត​នះ ភេទ​ប្រុស អាយុ​៣០​ឆ្នាំ បាន​អង្គុយ​លក់​គ្រឿង​អលង្ការ នៅ​ក្នុង​តូប​លេខ​G4061 ទី​រួម​ផ្សារ​ធំ​ថ្មី ពេលនោះ​ស្រាប់​តែ​មាន​ជនសង្ស័យ ​ឈ្មោះ ពៅ ចិន្តា ភេទ​ស្រី អាយុ​៥២​ឆ្នាំ ជនជាតិ​ខ្មែរ​ក្រោម បាន​ដើរមក​ប្រើ​ល្បិច​ធ្វើជា​រក​ទិញ​ខ្សែក ពេលនោះ​បាន​សុំ​ជនរងគ្រោះ យក​ខ្សែក​​មាស​ចំនួន​០៣​ខ្សែ ក្នុង​មួយ​ខ្សែ​ ទម្ងន់​ពីរ​តម្លឹង​ មក​រើស​មើល​ទៀត​ ឱកាសល្អ​ជនសង្ស័យ​បាន​យក​ខ្សែក ពណ៌​ក្រហម (​កាឡៃ​) ម៉ូត​ដូច ​បន្លំ​ដាក់​ ហុច​ទៅ​ឲ្យ​ជនរងគ្រោះ​វិញ រួច​បាន​លួច​យក​ខ្សែក​មាស​របស់​ជន​រ​ង​គ្រោះ ​កាន់​លាក់​ដើរ​គេច​ខ្លួន។ ពេលនោះ​ជនរងគ្រោះ​មើល​ដឹង​ថា​ ខ្សែក​ កាឡៃ​ បាន​ស្រែក​ឆោឡោ​ជនសង្ស័យ​បាន​បន្ត​រត់ ត្រូវបាន​កម្លាំង​នគរបាល​ប្រចាំ​ទី​រួម​ផ្សារ​ធំថ្មី​ដេញចាប់​ឃាត់ខ្លួន​បាន រួម​ជាមួយ​វត្ថុតាង​ខ្សែក​មាស​របស់​ជនរ​ង​គ្រោះ​យក​មក​ទីស្នាក់ការ​ទី​រួម​ផ្សារ​ធំថ្មី​ធ្វើការ​សាកសួរ​។​

បច្ចុប្បន្ន​ ជនសង្ស័យ​ កំពុង​ឃាត់ខ្លួន នៅ​អធិការដ្ឋាន​នគរបាល​ខណ្ឌ​ដូនពេញ កសាង​សំណុំ​ចាត់ការ​តាម​នីតិ​វិធី​ច្បាប់​៕