ប្រភពពី​មន្ត្រី​នៅក្នុង​អង្គភាព​សាខា​កាំកុងត្រូល ខេត្តបាត់ដំបង បាន​ឲ្យ​ដឹងថា បច្ចុប្បន្ន​តាម​ច្រកព្រំដែន​ជាច្រើន​កន្លែង​ក្នុងស្រុក​សំឡូត ស្រុក​សំពៅ​លូន និង​ស្រុក​កំរៀង ខេត្តបាត់ដំបង នៅតែមាន​ឈ្មួញ​នាំចូល​ទំនិញ​ជា​ប្រភេទ​ចំណីអាហារ​ខូចគុណភាព​និង​មាន​លាយ​សារ​ធាតុគីមី ពី​ទឹកដី​សៀម​ចូល​ទឹកដី​ខ្មែរ​រាប់សិប​តោន​ក្នុង​មួយថ្ងៃៗ​។ ប្រភព​បាន​ឲ្យ​ដឹង​ទៀតថា ការដែល​មន្ត្រី​កាំកុងត្រូល​ប្រចាំ​ច្រក​ទាំងនោះ​ហ៊ាន​ឃុបឃិត​ឲ្យ​ឈ្មួញ​នាំចូល​សាច់មាន់ ឆ្អឹង​មាន់ ជង្គង់​មាន់ គ្រឿងក្នុង​មាន់ គ្រឿងក្នុង​គោ ខូចគុណភាព​និង​ប្រហិត​ដែលមាន​លាយ​សារ​ធាតុគីមី ពី​ទឹកដី​សៀម​ចូល​ទឹកដី​ខ្មែរ​យ៉ាង​ពេញបន្ទុក គឺ​ដោយសារ​មានការ​ឃុបឃិត​បើកដៃ​ពី​សំណាក់​លោក ហាក់ សុខ​រិ​ន ប្រធាន​សាខា​កាំកុងត្រូល​ខេត្តបាត់ដំបង ផងដែរ​។ ទន្ទឹមនឹងនេះ​លោក ហាក់ សុខ​រិ​ន បែរ​ជាមាន​ជំនាញ​ខាង​បិទបាំង​អំពើពុករលួយ​របស់ខ្លួន​យ៉ាង​ក្រអឺតក្រទម​ដោយ​គ្មាន​សេចក្ដី​អៀនខ្មាស​បន្តិច​ណា​ឡើយ​។

មន្ត្រី​សាខា​កាំកុងត្រូល​ខេត្តបាត់ដំបង មួយចំនួន​បានលើកឡើង​ថា កាលពី​រសៀល​ថ្ងៃទី​១៨ ខែតុលា ឆ្នាំ​២០១៨ មន្ត្រី​កាំកុងត្រូល​ខេត្តបាត់ដំបង សហការ​ជាមួយ​មន្ត្រី​ពាក់ព័ន្ធ​បាន​ដុតបំផ្លាញ​ចោល​នូវ​ទំនិញ​ជា​ប្រភេទ​ចំណីអាហារ​ខូចគុណភាព​ចំនួន​៧០​គីឡូក្រាម​នៅ​ប៉ុស្ដិ៍​ភ្នំ​ដី ស្រុក​សំពៅ​លូន​។ ប្រភព​បាន​ឲ្យ​ដឹងថា ការដែល​លោក ហាក់ សុខ​រិ​ន ប្រធាន​សាខា​កាំកុងត្រូល​រៀបចំ​ឲ្យ​មានការ​ដុតបំផ្លាញ​សាច់មាន់ និង​ឆ្អឹង​មាន់​ខូចគុណភាព​សរុប​៧០​គីឡូក្រាម​នោះ គឺធ្វើឡើង​ដើម្បី​បិទបាំង​រឿង​ដែល​ខ្លួន​ឃុបឃិត​ឲ្យ​ឈ្មួញ​ធំៗ​នាំចូល​ទំនិញ​ដូចខាងលើ​រាប់សិប​តោន​ក្នុង​មួយថ្ងៃៗ ហើយ​យកមក​ចែកចាយ​ដល់​រាជធានី​ភ្នំពេញ ផងដែរ​។ ដូច្នេះ​លោក ម៉ក់ ពេ​ជ្ជ​រិ​ទ្ធ អគ្គនាយក​នៃ​អគ្គនាយកដ្ឋាន​កាំកុងត្រូល ក្រសួងពាណិជ្ជកម្ម មិនគួរ​មើលរំលង​ទង្វើ​មិន​ប្រក្រតី​របស់លោក ហាក់ សុខ​រិ​ន ប្រធាន​សាខា​កាំកុងត្រូល​ខេត្តបាត់ដំបង នោះទេ​។

តាម​ការអះអាង​របស់​ក្រុមអាជីវករ​លក់ដូរ ទំនិញ​ប្រភេទ​ចំណីអាហារ​តាម​ទីផ្សារ​ក្នុង​ខេត្តបាត់ដំបង បាន​ឲ្យ​ដឹងថា ពួកគាត់​ចាំតែ​រងគ្រោះ​ដោយសារ​អំពើពុករលួយ​របស់លោក ហាក់ សុខ​រិ​ន ប្រធាន​សាខា​កាំកុងត្រូល ខេត្តបាត់ដំបង ព្រមទាំង​បក្ខពួក​ប៉ុណ្ណោះ​។ ប្រភព​បាន​ឲ្យ​ដឹង​ទៀតថា តាម​ច្រកព្រំដែន​និង​ច្រករបៀង​ក្នុងស្រុក​សំឡូត ស្រុក​សំពៅ​លូន ស្រុក​កំរៀង និង​ស្រុក​ភ្នំព្រឹក ឈ្មួញ​ធំៗ​អាច​នាំចូល​ទំនិញ​ជា​ប្រភេទ​ចំណីអាហារ​ខូចគុណភាព​មាន​លាយ​សារធាតុ​គីមី​រាប់សិប​តោន​ក្នុង​មួយថ្ងៃៗ ហើយ​មិនឃើញ​កាំកុងត្រូល​ទប់ស្កាត់​ឡើយ​។ ប៉ុន្តែ​នៅពេល​ពួកគាត់​ទិញ​ទំនិញ​ទាំងនោះ​បន្ត​ពី​ឈ្មួញ​ធំៗ​យកមក​លក់រាយ​តាម​ទីផ្សារ​ត្រូវបាន​មន្ត្រី​កាំកុងត្រូល​ចុះ​ត្រួតពិនិត្យ​ដកហូត​យកទៅ​កម្ទេចចោល​ធ្វើ​ឲ្យ​ពួកគាត់​រកស៊ី​ខាតចុងខាតដើម​រហូត​។

លើស​នេះ​ទៅទៀត​នៅពេល​ពលរដ្ឋ​នាំចូល​ទំនិញ​ទាំងនោះ​បន្តិចបន្តួច​ត្រូវបាន​មន្ត្រី​កាំកុងត្រូល​បង្ក្រាប​យក​ស្នាដៃ​យ៉ាង​ក្រអឺតក្រទម ហើយ​បែរជា​ទុក​ឲ្យ​ឈ្មួញ​ធំៗ​នាំចូល​រាប់សិប​តោន​ក្នុង​មួយថ្ងៃៗ​ធ្វើ​ឲ្យ​ប៉ះពាល់​យ៉ាងខ្លាំង​ដល់​សុខភាព​ប្រជាពលរដ្ឋ​ខ្មែរ​នៅ​ទូទាំងប្រទេស​៕

ប្រភព៖ មនសិកាខ្មែរ