ភ្នំពេញ​៖​ នគរបាល​នាយកដ្ឋាន​ប្រឆាំង​បទល្មើស​សេដ្ឋកិច្ច​ នៃ​ក្រសួងមហាផ្ទៃ​ និង​មន្ត្រី​កាំ​កុង​ត្រួ​ល​មាន​ ការ​សម្របសម្រួល​ដោយ​ព្រះ​រា​ជ្ញា​រង​នៃ​តុលាការ​ដំបូង​រាជធានី​ ភ្នំពេញ​នៅ​ថ្ងៃ​ទី​១២​ ខែតុលា​ ឆ្នាំ​២០១៨​នេះ​បាន​សម្រេច​ដុត​បំផ្លាញ​ចោល​នូវ​ផលិតផល​ក្លែងក្លាយ​ មាន​ដូច​ជា​ស្ករត្នោត​ នំ​ និង​គ្រឿង​បរិភោគ​ និង​ឧបភោគ​មួយ​ចំនួន​ទៀត​ជាង​៤០​តោន​ ក្រោយ​ពី​ចាប់​បានជា​បន្តបន្ទាប់​ពី​ឈ្មួញ​ទុច្ចរិត​នា​ពេល​កន្លង​មក​។​

ថ្លែងប្រាប់​អ្នក​សារព័ត៌មាន​ខណៈ​កំពុង​កំទេច​ចោល​នូវ​ផលិតផល​ក្លែងក្លាយ​ទាំងនោះ​ ឯកឧត្តម​ឧត្តមសេនីយ៍ឯក​ ចាន់​ វ៉ា​ន់​ធឿ​ន​ ប្រធាន​នាយកដ្ឋាន​នគរបាល​ប្រឆាំង​បទល្មើស​ សេដ្ឋកិច្ច​ បាន​ឲ្យ​ដឹង​ថា​ ផលិតផល​ដែល​ក្រុមការងារ​បាន​ធ្វើការ​ ដុត​នេះ​គឺ​បាន​ចាប់ពី​ឈ្មួញ​ទុច្ចរិត​នា​ពេល​កន្លង​មក​ ហើយ​ឈ្មួញ​និង​ម្ចាស់​សិប្បកម្ម​ទាំងនោះ​ ត្រូវ​បាន​បញ្ជូន​ទៅ​តុលាការ​ចាត់ការ​តាម​នីតិវិធី​ច្បាប់​ផង​ដែរ​។​

​ថ្លែង​ក្នុង​ឱកាស​នោះ​ដែរ​ លោក​ ស៊ី​ន​ ស៊ី​ដេ​ត​ ប្រធាន​នាយកដ្ឋាន​មន្ទីរពិសោធន៍​នៃ​អគ្គ​ នាយក​កាំកុងត្រូល​បាន​ឲ្យ​ដឹង​ថា​ ផលិតផល​ទាំងនេះ​គឺ​ក្លែងក្លាយ​ទាំងអស់​ ហើយ​អ្នក​ប្រើប្រាស់​និង​បរិភោគ​នឹង​មាន​ផល​ប៉ះពាល់​ខ្លាំង​ដល់​សុខភាព​របស់​ពួក​គេ​។​

​យ៉ាងណា​ក៏​ដោយនៅ​ក្នុង​កិច្ច​សម្ភាសន៍​ជាមួយ​អ្នក​សារព័ត៌មាន​នោះ​ ឯកឧត្តម​ឧត្តម​ សេនីយ៍​ឯក​ ចាន់​ វ៉ា​ន់​ធឿ​ន​បាន​ធ្វើការ​អំពាវនាវ​ដល់​បងប្អូន​ប្រជាពលរដ្ឋ​ទាំងអស់​មុន​នឹង​ទិញ​ របស់​ប្រើប្រាស់​និង​បរិភោគ​ត្រូវ​ពិនិត្យ​ ឲ្យ​បាន​ច្បាស់លាស់​ពីព្រោះ​មាន​ឈ្មួញ​ទុច្ចរិត​និង​អគតិ​ ជា​ច្រើន​បាន​លួច​ផលិត​និង​លក់ខណៈ​អាជ្ញាធរ​មិន​ទាន់​ស្រាវជ្រាវ​រក​ឃើញ​នោះ​។​

ជាមួយ​គ្នា​នោះ​ឯកឧត្តម​ឧត្តមសេនីយ៍ឯក​ក៏​បាន​អំពាវនាវ​ដល់​ក្រុម​អាជីវករ​ ដែល​ទទួល​ ពី​ម្ចាស់​ទីតាំង​ដែល​លួច​ផលិតផល​ក្លែងក្លាយ​ទាំងនោះ​ ត្រូវ​សហការ​ជាមួយ​អាជ្ញាធរ​ដើម្បី​ឲ្យ​អាជ្ញាធរ​ចាត់វិធានការ​ឈ្មួញ​ទាំងនោះ​ទៅ​តាម​នីតិវិធី​ច្បាប់​ផង​ដែរ​៕