ភ្នំពេញ៖ គេមិនដឹងថាអ្នកជិតខាងម្នាក់នេះមានរឿងអី្វជាមួយប្រធានតុលាការរូបនោះទេទើបបានជានៅសុខៗ គាត់បានដាក់ពាក្យ
បណ្ដឹងទៅកាន់អង្គភាពប្រឆាំងអំពើពុករលួយដើម្បីឲ្យអង្គភាពមួយនេះបើការស៊ើបអង្គភាពពីទ្រព្យសម្បត្តិមិនប្រក្រតីរបស់លោក
ឌិន សុីវុទ្ធី ប្រធានតុលាការខេត្តស្វាយរៀងបែបនេះទៅវិញ តែទោះជាយ៉ាងណានេះជារឿងដ៏កម្របំផុត ការដែលពលរដ្ឋហ៊ានប្ដឹងប្រធានតុលាការនោះ ។
គេមើលឃើញថា ពាក្យបណ្ដឹងរបស់លោកស្រី សុីវ សៅលីនជាអ្នកជិតខាងម្នាក់របស់ប្រពន្ធលោកឌិន សុីវុទ្ធី បន្ទាប់ពីអង្គភាពប្រឆាំងអំពើរពុករលួយប្រកាសបើកការស៊ើបអង្កេតលើករណីលោក គឹម រស្មី
អតីតមេបញ្ជាការកងរាជអាវុធហត្ថខេត្តរតនគិរី និងលោក ស្រេង សុខា ស្នងការរងខេត្តកណ្តាល ដែលមានទ្រព្យច្រើនខុសធម្មតា មកដល់ពេលនេះលោកស្រីបានឈឺឆ្អាលឲ្យអង្គភាពមួយនេះ ជួយបើកការស្រាវជ្រាវអំពីប្រភពទ្រព្យសម្បត្តិដ៏ច្រើនរបស់លោក ឌិន ស៊ីវុទ្ធី ប្រធានតុលាការខេត្តស្វាយរៀងជាបន្ដទៀត ។
ពាក្យបណ្តឹងរបស់លោកស្រី ស៊ីវ សៅលីន ដែលជាអ្នករស់ក្បែរផ្ទះរបស់លោកស្រី ហង់ ប៊ុននី ជាអតីតប្រពន្ធលោក ឌិន ស៊ីវុទ្ធី បានដាក់ជូនអង្គភាពប្រឆាំងអំពើពុករលួយ ដោយស្នើសុំឲ្យអង្គភាពនេះ បើកការស៊ើបអង្កេតលើទ្រព្យសម្បត្តិរបស់
លោក ឌិន ស៊ីវុទ្ធី ព្រោះតែឈ្មោះនេះមានទ្រព្យសម្បត្តិច្រើនខុសប្រក្រតី និងមិនបានប្រកាសទ្រព្យសម្បត្តិឲ្យបានត្រឹមត្រូវនោះឡើយ ។
បើយោងតាម ពាក្យបណ្តឹងចុះថ្ងៃទី០១ ខែកុម្ភៈ ឆ្នាំ២០១៩ បានរៀបរាប់ថា កាលពីថ្ងៃទី០១ ខែមករា ឆ្នាំ២០១៩ ឈ្មោះ ឌិន ស៊ីវុទ្ធី ប្រធានតុលាការខេត្តស្វាយរៀង បានធ្វើកិច្ចព្រមព្រៀងលែងលះប្រពន្ធឈ្មោះ ហង់ ប៊ុននី និងបានដាក់ពាក្យប្តឹងសុំលែងលះប្រពន្ធទៅតុលាការខេត្តកំពង់ធំ។
រហូតមកដល់ថ្ងៃទី៣០ខែមករា ឆ្នាំ២០១៩ តុលាការខេត្តកំពង់ធំបានសម្រេចចេញដីកាលេខ០១ (ច) ចុះថ្ងៃទី៣០ ខែមករា ឆ្នាំ២០១៩ សម្រេចប្រគល់ទ្រព្យសម្បត្តិរួម នៅក្នុងខេត្តកំពង់ធំទាំងអស់ទៅប្រពន្ធឈ្មោះ ហង់ ប៊ុននី។
ចំណែកទ្រព្យនៅខេត្តផ្សេងៗទៀត ឈ្មោះ ឌិន ស៊ីវុទ្ធី បានទិញដោយដាក់ឈ្មោះ កេស គន្ធា ភេទស្រី និងឈ្មោះ ឈួន សុធារិទ្ធ ភេទប្រុស ដើម្បីបំភ័ន្តភ្នែកអង្គភាពប្រឆាំងអំពើពុករលួយ។
ពាក្យបណ្តឹងនេះក៏បានបញ្ជាក់ផងដែរថា កាលពីអំឡុងដែលលោក ឌិន ស៊ីវុទ្ធី កាន់តួនាទីជាប្រធានតុលាការខេត្តក្រចេះ បានកាងរថយន្តឈ្មួញឈើជាច្រើនដើម្បីបានលុយទិញដី ទិញផ្ទះជាច្រើនកន្លែងនៅតាមបណ្ដាខេត្ត ផ្សេងៗ ។
លោកស្រី ស៊ីវ សៅលីន បានសំណូមពរឲ្យអង្គភាពប្រឆាំងអំពើពុករលួយ បើកការស៊ើបអង្កេតលើលោក ឌិន ស៊ីវុទ្ធី ឲ្យបានច្បាស់លាស់ដើម្បីលុបបំបាត់អំពើពុករលួយពីសង្គមជាតិ។
ពាក់ព័ន្ធនឹងករណីនេះអង្គភាពគេហទំព័រ ដំណឹងពលរដ្ឋ PN Asia មិនអាចសុំការបំភ្លឺពីលោក ឌិន សុីវុទ្ធី បានទេ តែអង្គភាពយើងខ្ញុំរងចាំទទួលនូវការបកស្រាយបំភ្លឺជានិច្ច ៕
ប្រភព៖ PN Asia
